بسم الله الرحمن الرحيم
فيه حاجة نفسي أتعلمها أوي
لتلات أسباب
1- تعلم العلم فإنك لا تدري متى تَخْتَلِجْ إليه، كما قال بعض السلف
2- حساها إنها هاتكون إن شاء الله من أهم الأسباب اللي تخليني أقرب من ربنا أكتر
هاتخليني أزهد في الدنيا .. ما أنساش الآخرة
طبعاً ده كله بتوفيق ربنا قبل كل حاجة
لكن من باب الأخذ بالأسباب زي ما أُمرنا أنا حاساها هي دي
هي دي اللي هاتساعدني أظبط حاجات كتير إن شاء الله
ده غير الثواب الكبير و دي رقم
3
من غسل ميتا فكتم عليه غفر الله له أربعين مرة ، ومن كفن ميتا كساه الله من سندس واستبرق في الجنة ، ومن حفر لميت قبرا فأجنه فيه أجرى الله له من الأجر كأجر مسكن أسكنه إلى يوم القيامة .
الراوي: أبو رافع مولى رسول الله المحدث: الألباني - المصدر: صحيح الترغيب - الصفحة أو الرقم: 3492
خلاصة حكم المحدث: صحيح
خلاصة حكم المحدث: صحيح
يمكن يكون التغسيل فرض كفاية بس زي ما ذكرت الأسباب اللي مخلياني عايزة أتعلمه
أكيد مش هاشتغل في التغسيل بس عايزة أساعد و لو مرة أو اتنين كل شهر .. لأن يمكن أكتر سبب مخليني عايزة كده هو السبب التاني .. و زي ما بيقولوا كفى بالموت واعظاً
انا قلت أسيب الرسالة دي في المدونة يمكن لو حد شافها يتعلم التغسيل و يعمل فيه محتسباً و يمكن تكون نيتي خالصة فآخذ أجر معاه لحاد ما أتعلم أنا كمان إن شاء الله
بالنسبة لنتعلم فين؟
فدي سهلة إن شاء الله .. زي ما بيقولوا اللي يسأل ما يتوهش
أنا واحدة صاحبتي لما كلمتها على إني عايزة أتعلم حاجة زي كده قالتلي إنها تعرف اتنين صحابها كانوا بيغسلوا فهاتسألهوملي إن شاء الله و هاتبقى تيجي تتعلم هي كمان معايا بإذن الله :)
انتوا برده لو حد عايز ممكن يسأل أي شيخ قريب منهم أو البنات ممكن يسألوا أخوات في المساجد عندهم أو زوجات شيوخ أو حد من أولياء أمورهم يسألهم أي شيخ
و إن شاء الله تلاقوا
ابقوا اعرضوا الفكرة على صحابكم أو صحباتكم – اخوانكم أو أخواتكم - و احتسبوا الأجر
سواء هاينولوا السبب التاني او التالت .. و الدال على الخير كفاعله
و جزاكم الله خيراً
و السلام عليكم و رحمة الله و بركاته
ليست هناك تعليقات:
إرسال تعليق